喺中國古代，通常做得皇太后嘅，不外乎係皇帝親生阿媽，或者皇帝嘅嫡母，但係保姆做皇太后又有無聽過呢？真係有，仲要唔止一個。北魏時期，竇氏未成為惠太后之前，最初係以罪犯嘅身份入宮為婢，不過因為品行唔錯又知情識趣，後嚟被明元帝命為太子拓跋燾嘅保姆。竇氏直情將拓跋燾視如己出咁教養，兩人簡直情同母子。於是乎，拓跋燾即位後就尊竇氏為「保太后」，無幾耐仲正式冊封竇氏為皇太后添。數十年後，竇氏過身，太武帝仲要天下哭吊三天，可見太武帝對竇氏嘅重視程度有幾高。  

第二個係北魏昭太后常氏，佢本嚟係一個宮女，被選為拓跋濬嘅保姆之後，又係同拓跋濬朝夕相處，關係好好。所以拓跋濬即位後，常氏同竇氏一樣，先被尊為保太后，再改封做皇太后。不過常氏同竇氏一樣，因為同皇帝無血緣關係，死後係唔可以葬喺北魏皇家陵園。  

喺北魏，保姆之所以都可以做到皇太后，源自「立子殺母」嘅制度。北魏開國皇帝拓跋珪有鑒於前朝後宮干政，就效仿漢武帝殺死寵妃鉤弋夫人再立其子為太子嘅做法，實施「立子殺母」。後宮妃嬪嘅兒子一旦被冊封做太子，生母就要被賜死，而撫養太子嘅重任就交由保姆負責。親生阿媽死咗，太子同保姆日對夜對，關係自然好喇，所以先有保姆做皇太后嘅例子。

原圖嚟自網絡。

資料來源：金羊網