德國納粹黨領袖希特拉殘殺猶太人等殘酷手段都講過唔少，今日一於講講佢嘅平時生活。希特拉一生有唔少情人，但就只結過一次婚，而且呢段婚姻只係維持咗40個鐘，就以夫妻二人雙雙自殺告終。

伊娃‧布朗（Eva Braun）原本係希特拉嘅情人之一，佢17歲就識咗希特拉，而當時嘅希特拉已經40歲。伊娃年輕貌美，對政治一竅不通，好快就取得希特拉嘅歡心。希特拉曾經話自己「娶咗個國家」，所以唔會結婚生仔，更加唔會得一個情人。當伊娃被希特拉冷落嘅時候，佢就策劃一場「自殺」戲碼嚟引起希特拉注意，佢事先知會醫生，然後對住自己開槍，最終梗係死唔去，仲得到希特拉嘅探望同關心添。之後希特拉身邊出現一個各方面條件都比伊娃好嘅女人，伊娃倍受威脅，於是又吞咗24顆安眠藥假扮自殺，結局同樣係救得返，希特拉仲為此以伊娃嘅名義買咗間屋俾佢添。

伊娃可以為咗愛希特拉而死嘅深情，卒之都感動到希特拉（用自己條命仔嚟「較飛」，大家千祈唔好學），伊娃甚至開始可以影響到希特拉嘅決定，例如希特拉命令關閉女性髮廊，伊娃就話，為咗前線打仗嘅男人，女人更加需要時刻保持美麗依呢個理由，成功說服希特拉。1945年4月，二戰接近尾聲，德國喺宣佈無條件投降之前，伊娃終於如願同希特拉結婚，兩人共度咗幸福嘅40個鐘之後，伊娃服毒自殺，而希特拉亦都對住自己太陽穴開槍自轟，齊齊一命嗚呼。

圖為希特拉同伊娃，原圖嚟自網絡。