最近睇咗香港政壇元老鍾士元關於香港回歸歷程嘅回憶錄，提到中英談判期間，英國曾經作出兩次讓步，最終確認香港喺1997年回歸。詳情究竟係點？英國點解會响談判枱上節節敗退？

話說喺八十年代初，中英兩國開始就香港嘅前途問題談判，起初英方堅持承認「三個條約」（《南京條約》、《北京條約》同《展拓香港界址專條》）、「主權換治權」等等方向，但鍾士元回憶錄提到，經歷4輪談判之後，雙方仍然無任何進展，加上1983年出現「黑色星期六」，令香港出現信心危機，英方因而改變談判策略，唔再堅持討論香港治權問題，先聽吓中方1997年之後嘅對港政策，再作研究。之後喺1983年10月19至20日舉行嘅第5輪談判，中方正式提出喺1997年成立香港特別行政區。

其實時任立法局議員李鵬飛同年10月初上咗北京，會見中國國家安全部辦公室主任僮辛，以及國家顧問李強，僮辛同李強當時都提到，中國唔同意英國諗住九七後繼續管治香港15到30年嘅要求，仲表明英國如果唔合作，搞到場面無法收拾，中國逼不得已，就會即刻收返香港。

去到11月嘅第6輪談判之後，英國政府評估形勢，明白到中國無可能同意英方喺九七後繼續管治香港，英方認為堅持落去嘅話，會導致中英對抗升級，於是改變策略，確認1997年香港回歸中國係唯一方向。

圖為當年英國首相戴卓爾訪華，以及香港回歸，取自網絡。