尋日講完溥儀嘅婚姻，今日不如回到過去，講講佢祖宗順治嘅感情路。順治6歲登基，同年清軍入關，令佢成為滿清入關後第一位皇帝。順治先後有兩位皇后，不過都得唔到皇帝嘅歡心。直到1656年，董鄂氏入宮，順治對佢一見鍾情，直情當佢係一生摯愛。五個月內，順治先後封佢為賢妃、皇貴妃，又打破慣例，頒布詔書公告天下。

董鄂氏好快就為順治生咗皇四子，順治好開心，決定大赦天下，仲話係佢嘅「第一個兒子」，可想而知順治幾咁偏心，直接無視咗福全同玄燁兩個仔。不過好不幸，皇四子三個月大時，連名都未改得切就夭折，順治不顧禮法，將皇四子追封為和碩榮親王。《清史稿》提過董鄂妃寵冠後宮，不過都要命仔夠長先享受得到。三年之後，22歲嘅董鄂氏病故，順治悲痛欲絕，五日無早朝，之後佢再次不顧禮法，喺皇后在生嘅時候，追封董鄂氏為孝獻皇后。

董鄂氏病故後唔夠半年，順治駕崩，一段皇室愛情故事畫上句號。而皇位由皇三子玄燁繼承，亦即係康熙，令清代三朝盛世步向開端。

圖為《多情江山》劇照，取自網絡。