喺第二次世界大戰期間，日軍侵佔香港，令香港經歷三年零八個月嘅黑暗歲月。其實日軍早喺第一次世界大戰期間就已經嚟過香港，話說响20世紀初，英國同日本已經建立同盟關係，喺1914年8月4日，一戰爆發無幾耐，英國駐日大使格林就向日本提出，一旦戰事波及到遠東，希望日本可以協助保衛當時由英國管治嘅山海衛同香港。過咗幾日，格林喺8月7日又再提出，希望日本幫手喺中國海域攻擊德國艦隻。

如是者，日本嘅軍艦就不斷喺南中國海度游弋，經常停泊喺香港鯉魚門外。日本將香港視為進入南中國嘅跳板，既然嚟到香港，自然唔放過呢個做生意嘅好機會，當時有唔少日本人喺灣仔而家皇后大道東一帶經營各類生意，包括字畫古玩、書籍文具、瓷器漆器、藥品雜貨，甚至係理髮、影相店等等。後嚟日本脅迫中國簽署《二十一條》、中國經歷五四運動，令香港社會展開抵抗日貨行動，以支持國家。

圖片為一戰前嘅維多利亞港，自取網絡。