上個禮拜講《獨孤天下》嘅大姐獨孤般若果陣，有史友留言話二姐獨孤曼陀好惡頂，唔多想睇佢嘅戲份咁話，但佢嘅原型、真實嘅元貞皇后就同獨孤般若原型明敬皇后一樣，無乜記載，難唔難頂阿史就唔知，不過佢反而係三姐妹當中嘅贏家。點解？因為佢生咗個仔——唐朝開國君主李淵。

元貞皇后喺死後先被唐高祖李淵追封做皇后，至於點解佢會做咗李淵媽媽，咁就要由元貞皇后嘅爸爸獨孤信講起。話說喺北周果陣，獨孤信同未來親家李虎同係佐命大臣，兩人關係唔錯，獨孤信仲將自己個女，即係後嚟嘅元貞皇后嫁咗俾李虎個仔李昞，生咗李淵。元貞皇后雖然見唔到自己個仔稱帝，但佢本嚟就係皇親國戚，同李昞相濡以沫, 一生衣食無憂，過世之後被李淵追尊為爸爸嘅元貞皇后，享受李唐二百幾年香火供奉。比起姐妹明敬皇后嘅早逝、文獻皇后嘅善妒，元貞皇后綜合嚟講，係最後嘅大贏家。

圖為《獨孤天下》劇照，原圖嚟自網絡。