講完《獨孤天下》嘅獨孤般若同獨孤曼陀，點可以唔講埋戲入面嘅主角——隋朝開國君主楊堅嘅文獻皇后獨孤伽羅。

獨孤伽羅係歷史上有名嘅文獻皇后，佢仁愛、節儉、聰慧婉順，仲為國為民，同皇帝商談政事時，往往意見差唔多，所以宮入面稱佢同楊堅為「二聖」，具備一國之母嘅風範。雖然獨孤皇后係個賢內助，不過史書更多係講佢善妒。據《北史》所載，佢14歲時就嫁咗俾楊堅，唔俾丈夫同第二個女人生仔，可以話係堅守一夫一妻制度。

而楊堅真係信守承諾，全部仔女都由獨孤伽羅所出，後宮形同虛設。有一次，楊堅寵幸咗大臣尉遲迥嘅孫女，點知被獨孤伽羅發現，私底下解決咗個女仔。楊堅嬲到震，單人匹馬闖入山谷，大呻自己貴為天子，竟然連自由都無！嬲還嬲，楊堅返到去，獨孤伽羅一早喺度等住皇帝，見到老公仲喊晒口咁道歉，側邊嘅大臣又幫手講好說話，兩公婆又和好如初。

獨孤伽羅唔單止唔俾自己嘅老公三妻四妾，仲睇唔慣人哋老公納妾。每次見到啲大臣寵愛小妾，獨孤伽羅都會勸楊堅離佢哋遠啲，甚至叫楊堅罷免佢哋。亦都因為太子楊勇有一堆妾侍，令獨孤伽羅對佢有偏見，最後由晉王楊廣登基，成為隋煬帝。

圖為《獨孤天下》劇照，原圖嚟自網絡。