要做出成績，唔少得堅毅精神同刻苦訓練。香港有唔少優秀嘅運動員，付出血汗去爭取佳績，大家又知唔知香港响民國時期都出現過一位女飛魚楊秀瓊，當年年紀輕輕嘅佢唔單止贏過全運會、遠東運動會金牌，仲被稱為「水怪」、「美人魚」同「中國小姐」？

楊秀瓊祖籍東莞，於香港土生土長，佢十歲開始响北角七姊妹南華會游泳場學游水，初初學嘅係蛙式。1930年楊秀瓊參加香港渡海泳，並以32分39秒嘅成績勇奪冠軍，刷新自1920年香港有女子渡海泳以來嘅紀錄，嗰一年，佢仲未夠12歲，被稱為「水怪」。

去到1933年南京全運會，楊秀瓊代表香港出賽，囊括 4 項游泳及 1 項接力共5面金牌，成為泳壇新星。之後一年，楊秀瓊參加向菲律賓舉行嘅遠東運動會，成為四位女子泳隊成員之一兼隊長，其他成員劉桂珍、梁詠嫺同陳煥瓊都係嚟自香港。佢一共攞咗三項個人冠軍同一項街接力冠軍，可以話係攞金牌攞到手軟，仲被外國媒體稱為「中國小姐」。之後佢曾經代表中國出戰1936年嘅柏林奧運，成為當年第一位以及唯一一位參加游泳賽嘅中國女選手。

去到60年代，香港拯溺總會成立女子部，楊秀瓊擔任首屆主席，第二年佢响麗的映聲出鏡，介紹拯溺嘅工作，幫手呼籲大眾注意水上安全。最後楊秀瓊於80年代病逝，令「飛魚」嘅傳奇落下帷幕。

原圖取自網絡。