講起清朝出曬名嘅太監，不得不提慈禧太后身邊嘅大紅人安德海，此人唔單止有文化，城府又深，仲識得擦鞋，氹到慈禧鬼咁開心，非常得寵。而安德海就恃住有慈禧撐腰，開始目中無人，就連早前同大家講過嘅恭親王奕訢被慈禧罷去「議政王」頭銜一事，安德海亦有喺中間推波助瀾，安公公嘅權勢可謂日漸坐大。當時同慈禧一齊垂簾聽政嘅東宮太后慈安於是同奕訢聯手，決定除去安德海。

1869年,安德海借住去江南置辦龍袍嘅機會, 罔顧「太監不得出宮」嘅祖輩定下嘅鐵律，大搖大擺咁以欽差身份出宮。安德海雖係奉慈禧口諭外出，但無欽差公文，成為山東巡撫丁寶楨捉拿安德海嘅一大把柄。丁寶楨即刻上奏朝廷，仲要係上報俾由奕訢話事嘅軍機處。奕訢同丁寶楨一早夾定計，將安德海就地處決，免得將送返京城之後夜長夢多。兩人最終以安德海違背祖制、私下出宮嘅罪名殺咗安德海。慈禧雖然有意包庇安德海，但慈安企硬，「立命誅之」。心腹被除，慈禧就算明知係慈安同奕訢嘅計策，礙於大清祖制，都唔敢反抗。

圖為《大太監》安德海劇照，原圖嚟自網絡。