早排一連講晒《獨孤天下》入面嘅獨孤三姐妹點樣先後登上后位，今日又同大家講多位皇后，佢就係康熙皇帝嘅原配孝誠仁皇后。佢有咩咁特別？依一切一切，同輔政大臣鰲拜有好大關係。

孝誠仁皇后赫舍里氏喺康熙四位皇后入面最細個就嫁俾康熙，而且最早逝世嘅一位。當初康熙即位嘅時候先得6歲，按傳統應該由宗室親王攝政，但為咗避免攝政王掌握大權嘅情況再發生，順治帝欽點四位輔政大臣嚟輔助康熙。金庸小說《鹿鼎記》入面有「滿洲第一勇士」之稱嘅鰲拜就係其中之一，不過鰲拜後嚟權勢漸大，孝莊太皇太后為咗遏制鰲拜，揀咗另一位輔政大臣索尼嘅孫女赫舍里氏嚟做康熙嘅皇后。可以話，康熙同赫舍里氏本身係一場政治婚姻，不過兩人成婚果陣都只係得十零歲，少男少女情竇初開，婚後不知幾恩愛。

赫舍里氏嫻淑賢慧，將後宮打理得井井有條，等康熙無後顧之憂咁處理政事。1670年，赫舍里氏誕下皇子，可惜未滿4歲就夭折。赫舍里氏傷心過度，身體變差，康熙亦都更加關愛佢。1674年，赫舍里氏再誕下皇子胤礽，不過亦因此難產而死，康熙為咗憑弔愛妻，破天荒咁將胤礽立為太子。此後，每逢赫舍里氏忌日，除非有重大慶典，否則康熙都唔會去乾清門處理政事，呢個習慣一直持續到1699年。由此可見，康熙對孝誠仁皇后用情頗深。

圖為邵美琪飾演嘅孝誠仁皇后，原圖嚟自網絡。