細個學中文果陣，少不免都要查吓字典，睇吓點寫、解法咁，咁大家又知唔知中國第一本字典叫咩？答案就係《康熙字典》喇，佢係中國史上第一本以「字典」嚟命名嘅字典。

叫得《康熙字典》，梗係同康熙有關喇，1710年，康熙命人編纂《字典》，全書係依據明朝梅膺祚嘅《字匯》同張自烈《正字通》兩本辭典嘅基礎上增訂而成，前後耗時6年。《康熙字典》按照十二地支分為12集，每集又分為上、中、下三卷。呢部字典以214個部首分類，注有反切注音、出處同參考等，被公認係中國歷史上收錄字最多嘅一部字典。至於佢具體收錄咗幾多字，各家說法不一，最多同最少嘅說法相差成7000字，不過至少有收錄4萬字以上。

自從《康熙字典》頒佈之後，康熙下令凡係讀書人參加科舉，書寫嘅字必須以字典爲準，亦因此各地紛紛印製字典，令《康熙字典》成為清代流傳最廣嘅字典。不過，《康熙字典》成書之後，只係喺道光年間修訂過一次，由清代著名學者王引之修正咗超過2500個錯處，而隨住近代古籍研究發展，《康熙字典》入面被發現咗越嚟越多錯處，但佢喺辭書發展史上佔有重要地位，對後世嘅字典編纂有深遠影響。宜家連世界數字圖書館都有收錄《康熙字典》，大家喺網上都可以查到。 

原圖嚟自網絡。