蔣介石曾經避過好幾次暗殺，其中一次喺1935年11月1日，四屆六中全會响南京國民黨黨部召開，期間突然傳出三下槍聲，國民政府行政院長兼外交部長汪精衛中槍倒地，而兇手就係晨光通訊社記者孫鳳鳴。不過孫鳳鳴原本嘅刺殺目標係蔣介石，汪精衛可以話係做咗「替死鬼」。

孫鳳鳴原本係十九路軍嘅排長，佢不滿國民黨無將抗日放响首位，立志反蔣。一班有志之士1934年成立晨光通訊社，將孫鳳鳴打造成一個記者，等佢可以去各大機關同招待會採訪。刺殺行動當日，國民黨啱啱舉行完會議開幕式，所有代表都準備好曬，企定一齊影相，不過蔣介石就遲遲未到，於是汪精衛就上樓搵蔣介石。

蔣介石當時覺得外面人多又亂糟糟咁，再加上會議軍政首腦雲集，個個都帶幾個佩備手槍嘅隨從，擔心出現混亂，自己必定係頭號刺殺目標，所以就決定唔去影相，仲勸汪精衛都唔好去影，但汪精衛就覺得咁多人等緊，唔好意思唔現身，於是就返咗去影相。

喺影完相嗰一刻，孫鳳鳴突然喺記者群中行出，喺褸袋中拎咗支手槍出嚟，大叫「打倒賣國賊」，跟住就向汪精衛連開三槍，分別打中左臂、左頰同埋脊椎骨，流咗好多血。孫鳳鳴隨即被汪精衛旁邊嘅中委張繼攔腰抱實、張學良踢開支槍，而汪精衛嘅衛兵開槍還擊，孫鳳鳴當場中槍被擒，兩日後不治，而汪精衛就保得住條命仔。據傳蔣介石下令醫生點都要救返孫鳳鳴調查，不過最後都係救唔到。

細圖為汪精衛受傷圖片，取自網絡。