喺20世紀初，中國蘊釀緊一場革命，當時有個叫卞小吾嘅秀才決心投入革命、推翻滿清。喺1904年，卞小吾變賣祖產，將啲錢用嚟辦報，同年9月四川第一張日報《重慶日報》正式創刊發行。响1905年4月，《重慶日報》以〈老妓頤和園之淫行〉講述慈禧喺頤和園行樂嘅消息，引起轟動，結果《重慶日報》被重慶知府鄂芳下令查封，卞小吾被逮捕，關押喺成都。

《重慶日報》辦報之初，鑑於當時官員畏懼外國人，於是報館請咗日本人竹川藤太郎做社長，而卞小吾就親自寫社論，捍擊貪官污吏、鼓吹社會變革，份報紙鮮明嘅反清色彩引起注目。刊登咗抨擊慈禧嘅消息之後，卞小吾入獄，但佢繼續向獄友宣傳民主革命，仲寫咗《救危血》、《呻吟語》等宣傳革命嘅文章。

當時局勢轉得好快，啲官員遲遲都唔敢落手，直至1908年6月13日深夜，啲官員為免夜長夢多，收買咗同倉嘅王佑生用匕首殺死卞小吾，而第二日王佑生亦都喺監房被毒死。之後卞小吾嘅妻子袁氏趕到成都，開棺見到卞小吾身中七十幾刀，當場暈倒，而袁氏同卞小吾二哥多次擊鼓喊冤、奔走上訴，都以「兇手業已抵償」為由，不了了之。

原圖取自網絡。