張大千係一代國畫宗師，而孟小冬係梨園名伶，兩個人嘅年齡相差頗大，又唔係同一個專業範疇，究竟佢哋係點樣成為忘年之交嘅呢？

話說張大千同孟小冬師父余叔岩係舊識，一早就聽講過孟小冬，而孟小冬亦久仰張大千嘅大名。兩人嘅第一次見面喺香港，當時孟小冬就對初次見面嘅張大千行咗跪拜大禮，仲用滿人嘅請安式行禮，而張大千亦以叩拜回禮，二人互相尊重，亦因為咁開始咗佢哋嘅友誼。孟小冬唔鍾意清唱，因為清唱會令觀眾直接見到唇齒、兩腮嘅發音，非常唔雅觀。而張大千鍾意聽戲，尤其鍾意聽孟小冬唱，所以只有喺張大千面前，孟小冬先會破例清唱。後嚟孟小冬嫁咗俾杜月笙、定居台灣之後，更加唔輕易唱戲，而佢最後一次清唱都係唱俾張大千聽，可見兩人私交甚篤。

1962年，香港博物館主辦「張大千畫展」，張大千喺百忙之中專程去拜訪孟小冬兼聚舊。張大千為咗畫畫俾孟小冬，專登喺酒店另闢一室專心作畫。大作完成之後，張大千特登送去日本精工裱好、親筆題簽、親自上門送贈，佢仲同孟小冬講，呢幅畫係佢心情最好嘅時候畫嘅。孟小冬事前已經聽講張大千要送畫俾佢，非常開心。其實喺張大千送俾孟小冬嘅字畫入面，惟獨呢幅《六條通景大荷花》係署款「小冬大家」嘅，稱孟小冬係「大家」乃係尊敬孟小冬之意。

張大千晚年一直同孟小冬保持聯繫，1977年5月孟小冬逝世，張大千悲痛不已，親身去孟小冬墓前致祭。

圖為張大千夫婦同孟小冬合照，原圖嚟自網絡。