世界文化遺產莫高窟又叫做千佛洞，被譽為係東方藝術寶庫。莫高窟出土嘅寶物同文獻係研究敦煌文化嘅重要資料，飛天仙女同反彈琵琶等特色壁畫更加成為學者嘅研究重點，咁呢座舉世聞名嘅石窟，點解當年會被一個道士發現？

話說當年有個叫王圓篆嘅道士，佢1900年去莫高窟嘅時候，見到莫高窟日久失修，歷經風吹雨打，於是清理洞窟嘅石沙，無意中發現咗敦煌藏經洞。洞入面有大量經文、印本、畫幡、銅佛等文物，王道士於是向朝廷一一上報，仲送咗唔少文物出去。點知啲官員個個都唔騷佢，王道士就一路守住啲寶物。

後嚟莫高窟嚟咗一個叫斯坦因嘅英國人，對方嗱嗱林運走咗二十幾箱佛經、繪畫等寶物。莫高窟嘅發現轟動歐洲，其他國家例如法國、日本、俄羅斯等都唔執輸，紛紛派出探險隊去敦煌，陸續運走唔少珍貴寶藏。當中有個叫華爾納嘅美國人仲狼死，居然用特製膠布加埋黏劑敷落壁畫上面，將成幅壁畫剝落嚟撕走。

圖為莫高窟同王圓篆，原圖嚟自莫高窟官網。