講完康熙輔政大臣之一個嘅鰲拜，今日就再講多位索尼。之前提過康熙嘅元配孝誠仁皇后係索尼嘅孫女，其實索尼早喺清太祖努爾哈赤時期已經歸順，之後跟住清太宗皇太極攻打錦州，戰功赫赫。再之後索尼跟住睿親王多爾袞入關，但索尼就點都唔肯依附多爾袞，後嚟更受肅親王豪格同多爾袞嘅皇位之爭連累，被奪官抄家。直至順治帝親政，先將索尼召返嚟朝廷，恢復世職。

順治駕崩之後，索尼成為其中一位輔政大臣，所以去到康熙呢一代，索尼可以算係四朝元老。頭一、兩年，四位輔政大臣都幾盡心盡力輔助康熙，但後嚟鰲拜嘅權勢越嚟越大，野心亦慢慢流露出嚟。索尼雖然睇唔過眼，但佢同鰲拜畢竟同係兩黃旗，於是對鰲拜同另一位輔政大臣蘇克薩哈嘅明爭暗鬥隻眼開隻眼閉。1667年，索尼力邀其餘三位輔政大臣一齊上書，請求康熙親政。康熙雖然無應承，但下詔褒獎索尼忠心為國，加封一等公。

索尼呢個時候年紀已經好大，又多病，佢怕自己唔捱得幾耐，又驚年幼嘅康熙鬥唔過鰲拜，於是喺康熙拒絕親政無幾耐，索尼再次聯合輔政大臣蘇克薩哈同遏必隆，要求康熙親政，蘇克薩哈、遏必隆心知索尼嘅諗法，就配合佢主動向康熙請旨解除自己嘅職務，將全部權力歸還俾康熙，逼住鰲拜都要放權出嚟。

圖為索尼像同《鹿鼎記》劇照，原圖嚟自網絡。