之前講過欽差大臣林則徐寫信過維多利亞女王，叫佢哋唔好再運鴉片過嚟，之前林則徐喺虎門銷毀大批鴉片。英國為咗保護鴉片貿易，1839年國會通過出兵決定，翌年海軍少將懿律率領配備540門火炮嘅16艘軍艦、4艘蒸汽戰船、27艘運輸船、1艘運兵船同4000名士兵嚟到南中國海，要求清廷歸還收繳嘅鴉片或者賠償、割讓島嶼等，觸發第一次鴉片戰爭。

喺1841年5月，英軍派出2400人進攻廣州，無幾耐廣州附近要地全部失守，英軍攻佔廣州市，超過18000名清軍退返城內，靖逆將軍兼欽差大臣奕山向英軍求降。5月27日，雙方簽訂《廣州和約》，奕山率領軍隊退出廣州，並且向英軍支付600萬銀元作為「贖城費」。點知奕山虛報軍情，居然將件事調轉嚟講，等道光以為係英軍「乞和」。英軍其後打到去南京，最後清廷戰敗，簽訂不平等嘅《南京條約》，割地賠款。

原圖取自網絡。