之前講康熙嘅歷史，提到四位輔政大臣，佢哋嘅出現可以追溯返順治十八年（1661年），當年廿幾歲嘅順治駕崩，帝位由8歲嘅第三子玄燁繼位，是為康熙帝。順治臨終前唔想兒子行自己舊路，受宗室大臣多爾袞壓迫，於是選擇4位異姓大臣索尼、蘇克薩哈、遏必隆同鰲拜作為輔政大臣，多得影視作品嘅幫忙，相信最多人認識嘅就係鰲拜。

鰲拜成為輔政大臣之後，慢慢開始結黨營私，先後殺死戶部尚書蘇納海、直隸總督朱昌祚、巡撫王登聯同輔政大臣蘇克薩哈等政敵，令康熙震怒。喺康熙七年，康熙趁鰲拜入宮，設計將佢捉拿，當場宣布三十條罪狀，廷議當斬，但念在鰲拜歷事三朝，於是將佢革職拘禁。立過無數戰功嘅悍將，最終死喺禁所。

鰲拜歷事三朝，早喺滿清入關之前就立下唔少汗馬功勞。响崇德二年（1637年），清軍進攻明軍位於遼東皮島嘅重要基地，當時明軍嚴陣以待，炮火齊發，鰲拜憑住蠻勁奮勇殺敵，第一個登島同明軍以死相搏，最終清軍得以攻佔皮島，獲皇太極賜封為「巴圖魯」，有英雄、勇士嘅意思。

皇太極死後，多爾袞同皇太極長子豪格爭奪帝位，手握重兵嘅鰲拜堅決擁立皇太極之子，令多爾袞有所忌憚，最終由皇太極九子福臨繼位，是為順治帝。而順治親政之後，鰲拜深受重用、被視為心腹，不過因專權跋扈，最後被康熙剷除。

原圖取自網絡。