新一期居屋今日開始接受申請，好多同事都諗住抽，希望「上車」。唔少人抽咗好多次，咁大家又知唔知呢個居屋政策係响港督麥理浩任內推出？話說麥理浩嚟香港做港督之前係英國嘅外交官，做過越南同丹麥大使，响1971年成為香港第25任港督，一做就做咗超過10年，係香港史上任期最長嘅港督。佢任內推行多項政策，解決社會問題、促進社會發展，包括創立廉政公署、九年免費教育、十年建屋計劃、設立郊野公園、發展新市鎮和興建地下鐵等等，至今香港市民仍然受惠。

麥理浩响七十年代初宣布「十年建屋計劃」，包括興建大量公屋，話會令木屋成為歷史、消除生活環境擠擁嘅問題。不過1973年出現石油危機，導致全球經濟蕭條，影響到香港政府嘅收入，令公營房屋嘅建屋數量減少，於是乎政府諗到呢個「居者置其屋」計劃，由購買者承擔建造成本，打破困境。

圖為首代居屋之一悅麗苑、麥理浩，取自網絡。