之前講到鰲拜同索尼兩位康熙早年嘅輔政大臣，點可以唔講埋其餘兩位輔政大臣──遏必隆同蘇克薩哈？今日就講吓遏必隆先，遏必隆早年追隨皇太極進攻明朝，立下唔少戰功，到咗順治年間，獲授議政大臣、領侍衛內大臣，加少傅兼太子太傅。喺順治臨終嘅時候，佢同索尼、鰲拜、蘇克薩哈三人，一同被授命為輔政大臣。

康熙繼位之後，鰲拜逐漸變得驕橫、結黨營私，甚至誅殺大臣，遏必隆選擇明哲保身、置身事外，默許鰲拜呢啲行為，從未阻止或者彈劾佢。之後康熙捉拿鰲拜，遏必隆亦被捉拿，康親王傑書以12項罪名彈劾遏必隆，要求削佢太師之職、世爵之位，下獄論死。但康熙念在遏必隆係顧命大臣、勳臣之後，免佢死罪，命佢响內廷擔任宿衛。到咗康熙十二年（1673年），遏必隆病重，康熙親臨府邸慰問，遏必隆同年病逝，謚號「恪僖」。

原圖取自網絡。