中美貿易戰嘅發展峰迴路轉，令環球金融市場震騰騰。記得上年已經講過美國發動貿易戰嘅依據，係來自四十幾年前嘅301條款，並曾經幾次向中國出招。其實除咗中國之外，美國响八九十年代都試過多次使用同一條款，向依家嘅盟友日本發動貿易戰，逼使日本打開半導體、汽車等市場，被認為係導致日本半導體產業步向沒落嘅重要原因。

美國同日本响八九十年代產生貿易摩擦，話說1985年日企NEC嘅半導體銷售額爬咗美國企業頭，成為主宰全球市場嘅一哥。《日本經濟新聞》報道，美國企業失去龍頭地位同唔少市場佔有率，眼見危機殺到埋身，於是向美國貿易代表辦公室投訴，聲稱日本對半導體記憶體DRAM等進行傾銷。美國方面之後抨擊日本市場封閉，仲話長此下去美國只能依靠外國技術，會威脅到國家安全，所以動用301條款逼日本讓步，甚至對日本進口嘅半導體產品加徵100%關稅。

頂唔住美國嘅壓力，日本1986年簽咗《日美半導體協定》，承諾限制出口兼且响日本市場接受外國製造半導體，因而斷送咗市佔率，被認為係導致日本半導體走向沒落嘅原因之一。

唔夠十年之後，日本汽車業再次成為美國目標，1995年美國宣佈對日本十幾款高檔車徵收100%關稅，暗示啟動301條款，逼日本購買更多美國汽車零件。日本企業透過提高海外生産比例等計劃拆招，先至令烽煙漸漸平息。

睇返美日貿易戰嘅歷史片段，可見今時今日美國所用嘅招數，同過去面對日本嘅情況其實有唔少相似之處。不過隨著國際同經濟形勢轉變，中國亦無當初日本於戰敗後所背負嘅歷史包袱，面對美國時談判籌碼更多，結局如何，且看兩國如何分解。

圖為美國議員抗議日本半導體和電子產品傾銷，取自網絡。