今次講埋康熙登基初年嘅最後一位輔政大臣蘇克薩哈，佢喺同鰲拜嘅鬥爭中慘敗，結果喺康熙逮捕鰲拜之前就被處死。

順治在位期間，蘇克薩哈原本係攝政王多爾袞嘅親信。多爾袞死後，蘇克薩哈為咗取悅順治，就遞交咗一份檢舉信，檢舉多爾袞生前圖謀造反，又以龍袍陪葬，據講導致多爾袞被掘墳鞭屍，十分淒慘。事後順治非常高興，蘇克薩哈得以步步高升，做過太子太保。喺順治病重嘅時候，蘇克薩哈就同索尼、鰲拜、遏必隆被授命為輔政大臣。

不過蘇克薩哈同鰲拜非常唔啱key，尤其是當時兩黃旗同兩白旗發生「換地之爭」，蘇克薩哈係正白旗人，鰲拜、索尼同遏必隆就係兩黃旗嘅人，如是者兩黃旗就有較多優勢，而蘇克薩哈亦都長期喺同鰲拜嘅鬥爭中處於下風。到咗康熙六年（1667年），索尼病逝之後，康熙親政，蘇克薩哈眼見自己功成身退，亦希望避開鰲拜，於是請辭話要為順治守陵，但點知鰲拜唔放過佢，網羅咗24項罪名，要求康熙處死蘇克薩哈。最後康熙喺鰲拜脅逼之下，處死依位輔政大臣。

圖片為劇照，取自網絡。