上次講起前港督麥理浩任內推出咗居屋計劃，幫市民「上車」，除此之外佢任內亦都通過《郊野公園條例》。漁護署根據條例，喺1979年劃定咗21個郊野公園，而全長100公里嘅麥理浩徑喺同年正式啟用，成為香港最長、最早啟用嘅行山徑。計一計數，原來麥理浩徑今年已經40歲喇。

原來當時麥理浩徑嘅設立，並唔係由麥理浩落order，而係出自漁護署內部嘅諗法。話說當時劃定郊野公園嘅工作差唔多完成，漁護署為咗慶祝，就整咗麥理浩徑，並用嚟感謝麥理浩對郊野公園嘅支持（前一任嘅戴麟趾無咁積極），當年麥理浩都有出席麥理浩徑嘅剪綵開幕。喺2016年，麥理浩徑就獲《國家地理雜誌》選為全球20條最佳行山路徑之一，形容具挑戰性、難度高。

原圖取自網絡。