上個禮拜嘅《倚天屠龍記》講到陳友諒為咗打擊明教，不惜利用周芷若嚟誘宋青書入丐幫，搞到周芷若差啲被宋青書強姦，好彩武當七叔趕到阻止，不過七叔本人就無咁好彩喇，最後竟然被陳友諒同宋青書聯手殺死。睇到呢度，唔少觀眾都覺得陳友諒簡直係個人渣，但係歷史上嘅陳友諒又係個咩人呢？

據《明史》記載，陳友諒生於宜家嘅湖北仙桃市，佢原本姓謝，後嚟入贅陳家先改姓。有見於元朝嘅腐敗，陳友諒加入起義軍，做埋首領，一路率軍攻陷安慶、龍興、瑞州等地，最後仲建都江州（宜家江西九江市），自稱大漢王，成為長江以南勢力最大嘅義軍，同時亦都係朱元璋（後嚟嘅明太祖）最大嘅阻力。朱元璋擔心陳友諒會同另一股以張士誠為首嘅義軍聯合對付自己，於是設局命陳友諒嘅老友康茂才寫信，引陳友諒過嚟。陳友諒中計，被朱元璋嘅伏兵攻擊，陳友諒大敗，退返江州。朱元璋乘勝追擊，陳友諒唯有逃去武昌。

而正當朱元璋忙緊處理紅巾軍內亂，準備接應小明王韓林兒嘅時候，陳友諒認為係時候反擊，於是率兵進攻洪都（今江西南昌）。1363年，陳友諒同朱元璋喺鄱陽湖大戰40幾日，最終被亂箭射死。正史對陳友諒嘅評價頗低，不過佢作為反元朝腐政嘅首領，對後嚟明朝嘅建立有一定影響。

圖為《倚天屠龍記》劇照同朱元璋畫像，原圖嚟自網絡。