相信大家睇清宮劇果陣都應該有留意到，慈禧身邊嘅太監、宮女都鍾意叫佢做「老佛爺」，呢個稱呼究竟點嚟嘅呢？其實「老佛爺」呢個名並唔係慈禧嘅專利，佢原本係清朝對皇帝嘅特別稱呼。女真人嘅首領有「曼殊」、「滿柱」之稱，有代表吉祥之意，亦有說法話係文殊菩薩嘅化身。清朝建立之後，滿語「滿柱」就直接譯為漢語「佛爺」，所以清朝皇帝又叫做老佛爺。

至於慈禧雖然唔係皇帝，但佢垂簾聽政，權力等同於皇帝，所以慈禧中意人哋叫佢老佛爺。民間仲有個說法話，慈禧曾經將自己扮成觀音，叫埋身邊最得寵嘅太監同宮女扮成金童玉女，同時用西方嘅投影技術，將三個人嘅巨大人影喺寢宮度投射出嚟，宮入面嘅人見到，都紛紛稱呼慈禧做老佛爺。

唔單止清朝嘅皇帝有特殊稱呼，唔少朝代嘅皇帝除咗本身嘅尊號之外，都有啲特稱，就好似宋朝皇帝叫「官家」，明朝皇帝叫「老爺」咁。

原圖嚟自網絡。