清朝實行閉關鎖國以嚟，廣州成為唯一一個對外通商嘅港口。由於清廷規定，外國商人唔可以同中國商人、官員直接接觸，亦都因此出現咗十三行呢種貿易中介。當中嘅怡和行由伍家打理，其後响伍秉鑒帶領下更成為十三行入面嘅領袖，伍秉鑒自己亦登上世界首富嘅寶座。伍秉鑒唔止做生意叻，份人仲好豪爽添。

伍秉鑒祖籍福建，其父親定居廣東之後開始經商，創辦咗元順行。伍秉鑒接手元順行之後，改名做怡和行，憑住佢精明嘅生意頭腦加上八面玲瓏嘅交際手段，怡和行迅速發迹。當時有個美國商人同伍秉鑒夾份經營一單生意，但由於經營不善，差落伍秉鑒成7.2萬兩白銀。呢個美國商人一直無辦法還債，搞到滯留廣州，無得返鄉下。

伍秉鑒知道件事後，親手撕爛咗呢張價值7.2萬兩白銀嘅借據，仲同個美國商人講：「You are No.1 old friend,you belong honest man,only go no chance. Just now have set tea counter,all finished,you go.」呢兩句令人搲爆頭嘅中式英文係話：你係我最好嘅老朋友，人幾老實，不過就係差啲運；宜家債務一筆勾銷，你可以回國喇。7.2萬兩白銀喺當時嚟講係筆可觀嘅財產，據講當時一艘遠渡中國嘅中型商船，所帶嘅貨物都係價值大概十萬元，所以伍秉鑒慷慨嘅舉動，令佢聲名遠播。

當然，伍秉鑒之所以咁豪爽，好大原因源自佢嘅富有。喺2001年美國《華爾街日報》嘅報道入面，過去一千年世界上最有錢嘅50人之一（當中有六個中國人，伍秉鑒係唯一商人）。據美國商人亨特《廣州番鬼錄》所載，伍秉鑒究竟有幾多錢，係大家經常辯論嘅題目，啲錢多到根本估唔到，怪唔得咁疏爽喇！

原圖嚟自網絡。