清兵入關之後，因為八旗兵力不足，為咗對付各地義軍同南明政府，要依靠明朝降將嘅勢力去鎮壓同招降，平西王吳三桂就係其中一個。佢歷來都被人叫做「漢奸」，為人反復無常、見利忘義，但原嚟佢後生果陣都算係一個少年英雄。

吳三桂嘅父親吳襄係明朝武將。1629年，清太宗皇太極率軍入關，吳襄嘅偵察部隊被皇太極嘅兵馬圍困，吳三桂當時帶住幾十個家將喺重圍入面救出父親，被皇太極讚佢用兵得當，吳三桂亦因此聲名大噪。咁樣一個善於征戰嘅年輕將領，無論係皇太極，定闖王李自成兩股勢力都想要收歸麾下。崇禎皇帝自縊之後，李自成捉咗吳三桂屋企人，又用封侯、賞賜嚟招降吳三桂，吳三桂本嚟應承歸順，不過中途發現李自成手下大將劉宗敏霸佔咗自己嘅愛妾陳圓圓，於是有咗衝冠一怒為紅顏、引清兵入關嘅歷史。

吳三桂為咗報仇，主動寫信叫清兵同佢裡應外合，並打開山海關城門，將江山拱手出讓，並親自於關上迎接多爾袞，之後更領兵追擊，消滅李自成，被封為平西王。不過去到康熙執政時期，平南王尚可喜被削藩，吳三桂於是號召反清復明，自稱為「大明天下都招討兵馬大元帥」，聯合靖南王耿精忠等藩王起兵造反，史稱三藩之亂。

圖為吳三桂畫像同《鹿鼎記2》劇照，原圖嚟自網絡。