上次講開八國聯軍入侵中國嗰陣，兩廣總督李鴻章聯同多位巡撫、督撫實行「東南互保」，令長江中下游及東南各省唔受戰爭影響，今次就詳細少少同大家講吓「東南互保」係咩嚟。

喺1900年6月，清廷向英、美、法、德、意、日、俄、西、比、荷、奥11國同時宣戰，兩廣總督李鴻章、兩江總督劉坤一、湖廣總督張之洞同山東巡撫袁世凱收到宣戰詔書之後，一致拒絕其有效性，指係一個「亂命」，即係未經皇室授權嘅非法召令，同時封鎖宣戰嘅消息。之後喺鐵路和電訊督辦盛宣懷嘅建議之下，張之洞同劉坤一同上海嘅外國領事達成非正式協議，表示會保護外國人嘅生命同財產，以及喺管轄區內鎮壓義和團，換取外國列強唔派軍隊進入地區。其後李鴻章、袁世凱，以及閩浙總督許應騤等亦同意有關條款，希望保護中國東南地區免受戰爭影響。

外界一直以來對「東南互保」都有唔同評價，雖然可以避免東南各省遭到列強入侵，但亦有人認為係導致民國初期軍閥割據局面嘅開始。

原圖取自網絡。