之前放假搭東鐵綫去玩，點知同行嘅史友話條鐵路連英國默劇喜劇大師差利卓別靈都搭過，叫阿史出返段文。宜家嘅東鐵綫曾經係九廣鐵路嘅一部分，搵返資料，其實卓別靈嚟過香港唔止一次，當時佢就係搭呢條綫來往廣州同香港遊覽。

話說响1936年，卓別靈第二次訪港，受香港首富何東爵士邀請，去西摩道八號嘅「紅行」出席茶會，期間兩人無所不談。不過，由於卓別靈嘅未婚妻唔係好適應香港潮濕嘅天氣，身體不適，卓別靈於是轉戰新加坡、峇里、越南等地遊覽。同年5月，卓別靈再到香港，翌日搭九廣鐵路去廣州遊覽，仲搭埋尾班車即日返香港添。

圖為卓別靈同何東合照，原圖嚟自香港歷史博物館。