外國傳教士嚟中國傳教早喺清朝之前已經開始，但傳教士做埋皇帝老師，仲影響埋皇位繼承人選，湯若望都算係第一個。湯若望原名約翰•亞當•沙爾•馮•貝爾，係德國天主教傳教士，因精通天文學知識，清初時期受攝政王多爾袞賞識。湯若望仲醫好咗孝莊太后嘅侄女、皇后博爾濟吉特氏嘅病，孝莊太后因而認咗佢做「義父」，連順治都要尊稱佢一聲「瑪法」（滿語嘅爺爺）。

湯若望成為清朝皇室嘅上賓，亦深受順治器重，順治唔單止封湯若望做通議大夫，連佢嘅父母、阿爺阿嫲都受封，仲專登將誥命詔書封好寄去德國，真心愛屋及烏。

順治曾賜過湯若望「通玄教師」稱號，但兩人嘅感情遠勝師生，順治經常去湯若望嘅住所拜訪，留得耐咗索性喺湯若望屋企進餐，感情深厚。就連順治臨終前要確立皇位繼承人嗰陣，都有問過湯若望意見，湯若望當時支持孝莊太后嘅主張，又建議揀一個生過天花嘅皇子，於是玄燁毫無懸念咁繼承皇位，成為後嚟嘅康熙。

原圖嚟自網絡。