上次講起康熙年間嘅官員姚啟聖勸掂明鄭將領施琅為清廷效力，收復台灣，今次就介紹吓施琅呢位將領。施琅生於明朝天啟元年（1621年），早年係鄭成功爸爸鄭芝龍嘅部下，順治三年（1646年）隨鄭芝龍降清，但後來變節追隨鄭成功，對抗清朝，並立下唔少戰功。之後鄭成功殺死施琅父子兄侄，令施琅再次降清，由明鄭嘅親密戰友變做強大敵人。

後來清廷決定攻台，康熙二十年（1681年）任命施琅做福建水師提督並作出部署。2年之後，施琅指揮清兵喺澎湖海戰大勝明鄭水師，明鄭嘅鄭克塽率領臣民降清。據講當時康熙喺中秋收到消息，龍顏大悅，除咗件龍袍，派人賞賜畀施琅。喺清廷收復台灣之後，曾經出現對台灣嘅棄留之爭，最初唔少大臣甚至康熙都認同要放棄台灣，但施琅就上疏指台灣關乎江蘇、浙江、福建、廣東等地防護重任，而且土地肥沃、物產豐富，又警告荷蘭等外國侵略者都吼住台灣，如果唔守住台灣，一旦被外國侵佔就返唔到轉頭，施琅嘅上疏雄辯有力，最終令康熙同唔少大臣改變主意，派兵駐守台灣。

原圖取自網絡。