之前講過文學家魯迅嘅另一半——許廣平嘅故事，其實許廣平嘅來頭一啲都唔簡單！佢1898年出世，來自廣州嘅名門望族許家。許廣平嘅高祖許拜庭係廣州大鹽商，曾經富甲一方，出錢出力幫過清廷剿捕張保仔等海盜，而許廣平嘅爺爺許應騤就係慈禧太后嘅心腹，位極人臣。其實大家到今時今日都有機會見到許家成員，演技生鬼嘅藝人「Benz雄」許紹雄係其中一人，佢嘅嘅姑婆就係許廣平。

講返許廣平，佢喺1917年入讀天津直隸第一女子師範學校預科、擔任《醒世周刊》主編，參加過五四運動。1923年，許廣平考入北京女子高等師範學校國文系，成為魯迅嘅學生，1927年魯迅去咗中山大學任教，許廣平追隨魯迅，做佢嘅助教同廣東話翻譯，同年10月二人喺上海正式同居，1929年許廣平生咗兒子周海嬰，佢哋一齊生活直至魯迅1936年逝世。

不過魯迅同許廣平一直都未曾正式結婚，據講魯迅係因為唔想令母親傷心，而一直唔同元配朱安離婚，於是魯迅就一直只對外宣稱許廣平係佢嘅助手，而許廣平亦都堅稱只係同居關係。