喺1916年，袁世凱稱帝呢場鬧劇結束之後，翌年「辮子將軍」張勳又搞咗場復辟鬧劇出嚟。話說當時由軍閥黎元洪出任民國總統，不過黎元洪喺應否參加第一次世界大戰嘅問題上，同國務院總理段祺瑞出現意見分歧。段祺瑞主張對德宣戰，而黎元洪同國會就反對開戰。喺1917年5月中，段祺瑞喺未經總統同國會同意下，對德國宣戰。於是國會就敦促黎元洪解除段祺瑞總理職務，而黎元洪亦都响5月23日出手，但黎元洪估唔到，段祺瑞响陝西、山西、浙江、山東、直隸、福建諸省嘅同黨迅速宣布獨立，並且向北京進軍。

黎元洪見到咁大鑊，就向安徽督軍張勳求助，張勳6月7日率領5000名士兵進入北京，並要求黎元洪解散國會，作為調停黎、段衝突嘅先決條件，黎元洪唯有照做。後來張勳喺北京企穩陣腳之後，7月1日進入紫禁城，喺清末舊臣康有為支持下，擁戴末代皇帝溥儀復辟，再度稱帝。但消息一傳出，就引嚟全國人反對，孫中山喺上海發表《討逆宣言》，而段祺瑞就組織討逆軍，迅速將張勳嘅「辮軍」擊潰，而張勳就逃入荷蘭使館，結束呢場為期短短12日嘅鬧劇。

圖為張勳、溥儀，取自網絡。