國父孫中山曾經喺香港生活過一段唔短時間、喺香港接受教育，而香港既係佢革命思想嘅發源地，亦係佢策劃革命嘅根據地。唔講唔知，當時港英政府就曾經先後三次向佢發出驅逐令，但其實又唔係對孫中山趕盡殺絕喎，反而側面顯示出港英政府對革命嘅容忍態度；點解咁講？

話說港英政府第一次向孫中山發出驅逐令，係响1895年廣州首義之後，兩廣總督譚鍾麟向港英政府施壓，要求引渡孫中山。雖然港英政府拒絕清廷要求，但港督羅便臣爵士會同議政局（即係而家嘅行政會議）亦响1896年3月向身在夏威夷嘅孫中山發出為期5年嘅驅逐令，藉以化解外交危機。驅逐令生效期間，孫中山搭船經過香港嘅時候都無登岸，革命黨人就利用中間短暫嘅空檔上船同孫中山會面、籌劃革命。5年之後，港英政府無即時再發出驅逐令，於是孫中山就利用呢段真空期，嚟到香港同革命黨人會面，並處理革命黨人楊衢雲遇刺嘅善後問題。後來，當時傳媒披露孫中山行蹤，港英政府先至喺1902年1月先再發出5年驅逐令，至1907年1月結束。

第二次驅逐令結束後，港英政府又無即時續發驅逐令，直至1907年年中爆發黃岡同七女湖起義，清廷要求港英政府協助緝拿同引渡革命黨人鄧子瑜，港英政府唯有向鄧子瑜同孫中山再發出5年驅逐令，以解決風波。直到1911年辛亥革命成功推翻滿清之後，孫中山終於再次獲准去到香港，同粵港商人、港英政府官員會面。

圖為1912年5月孫中山與署理港督施勳會面，取自網絡。