香港天氣咁熱，條褲長少少都熱到頂唔順，女士更加唔使講，小背心、短褲、短裙一早出動，咁大家有無諗過古人夏天著咩嘅呢？

無論係咩朝代，平時我哋睇開嘅古裝劇，入面嘅角色就算喺大熱天時都係著長衫長褲。的而且確，就算唔同時期嘅衫款式唔同，但基本都係貼身內衣、中衣、外套、配飾咁嘅搭配。咁著法，夏天咪熱到中暑？即係咁，古代嘅氣溫同宜家比係無咁熱嘅，而且佢哋夏天嘅衣料係相對薄啲、透氣啲。以清朝為例，入夏之後，衣物嘅衣料主要用唔同嘅紗嚟做：實地紗最密，但亦有鏤空效果；芝麻紗顧名思義，紋路好似芝麻咁細，比實地紗透氣；亮地紗就最清透涼爽。

不過，用紗製成嘅衫始終比較透，容易走光，所以女士一般會喺紗衣入面著唔透光嘅抹胸、襯衣等，就好似唐朝嘅仕女圖咁。而做官嘅男士，由於官服前後有開衩，更加就要打底，防止露腿。另外，炎炎夏日如果一定要著外套嘅話，古人仲會貼身著一件用幼竹管串成嘅隔汗衣，透氣清爽，可以減少啲熱感外，仲可以避免出汗整濕外衣。

圖為《簪花仕女圖》同隔汗衣，原圖嚟自網絡。