今日香港索償協會幾十人遊行去日本駐港澳領事館示威，要求賠償二戰期間市民兌換軍票嘅損失，阿史一於再講少少軍票嘅歷史先。喺1941年12月25日，港督楊慕琦向日軍投降，象徵香港3年零8個月淪陷時期嘅開始。到咗1942年1月3日，日軍成立嘅軍政廳制定〈香港九龍經濟復興應急對策綱要〉、〈香港九龍金融應急對策綱要〉，提到要以軍票為基本流通貨幣，以維持軍票價值、排除英美嘅金融勢力，同時又容許以港幣2比1嘅兌換比率兌換軍票，收返嚟嘅貨幣用嚟喺中國大陸同澳門購買物資。

起初，香港嘅市民大眾都對兌換軍票不感興趣，但到咗1月中，隨住香港貿易停止，港幣亦開始貶值，香港居民亦唯有兌換軍票。無幾耐，香港佔領地總督部制定嘅〈香港佔領地通貨整理要領〉亦提到，要不惜犧牲一部分人利益，誘導香港貨幣貶值，並確立「軍票一體化」作為統治目標。喺同年7月，港幣兌換軍票嘅比率，進一步由2比1降至4比1。喺戰後，軍票唔再流通，市民手中嘅軍票變成廢紙。

香港索償協會上任主席吳溢興曾經憶述，戰後佢爸爸每晚都會喺床上數軍票，最後因為睇唔開而病逝，臨終時仲囑咐仔仔要向日本人追返啲錢，而吳爸爸留低嘅軍票超過18萬。吳溢興有日本當時最高行政機關嘅機密文件，顯示日本人原本打算逼大眾用10蚊港元兌換1軍票，極為無理。

圖為日本軍票，取自網絡。