共同社尋日報道，日本發現咗二戰期間日軍喺中國北方作戰時使用毒氣彈嘅詳細紀錄，日軍使用嘅化武包括令皮膚同粘膜潰爛嘅「糜爛劑」，以及強烈刺激呼吸器官嘅「噴嚏劑」。日軍當年有系統咁銷毀記錄文件，今次搵到呢份《戰鬥詳報》嘅日本現代史研究學者松野誠也相信，係有相關人士秘密保管，份文件先至倖免於難。松野仲提到，今次係首次發現地面部隊响中國使用裝有糜爛劑嘅「黃彈」。

呢份《戰鬥詳報》大約有100頁，記錄咗日軍喺山西省山岳地區戰鬥同埋使用炮彈、毒氣彈嘅情況。報告提到，當時大隊收到上級命令之後，決定動用「黃彈」以及加入噴嚏劑嘅「紅彈」。喺1939年7月6日，日軍用機關槍向中國軍隊陣地發射31枚紅彈，去到17號，更大舉使用60枚紅彈同28枚黃彈嚟配合步兵嘅侵略，第二日再炮轟140枚紅彈同20枚黃彈。報告顯示，日軍認為攻擊山岳地區敵人陣地，紅彈係「不可或缺」，而對黃彈嘅評價就係「效果非常大」。

除咗《戰鬥詳報》，舊時美國有唔少檔案都指出日本喺中國用過毒氣，有研究呢啲美國檔案嘅日本學者吉見義明响期刊《抗日戰爭研究》中指出，除咗山西，日軍1941年亦都喺福建、湖北、廣東、浙江等地用過毒氣彈。吉見義明引述美國檔案話，一旦人類接觸到呢啲糜爛劑，身體就會即刻潰爛，日軍除咗裝入炮彈，仲會將啲糜爛劑搽喺家具上面，又將受到污染嘅米、肉、罐頭、武器、軍裝遺棄，等啲中國軍人接觸到之後身體潰爛。

圖片為日軍當年戴住面具搬運毒氣彈，取自網絡。