聽日就係DSE放榜嘅大日子喇，阿史一於同大家回顧吓新高中課程改革嘅歷史先。喺2004年嘅《施政報告》，時任特首董建華宣布接納教育統籌委員會建議，將舊有三二二三學制，改為三三四學制，新學制最終响2009年9月開始推行，而大學就响2012年開始實行四年制。

喺2012年9月，舊制中七學生同新制中六學生一齊升讀香港嘅大學，正式踏入「雙軌年」，大學都「嚴陣以待」，準備多一倍學生入讀。首當其衝就係宿位問題，多咗學生入讀，宿位緊張，各間大學都諗盡辦法增加宿位，同時間競賽。當年教資會就表示，喺9月之前「八大」一共有6個大學宿舍項目完工，提供超過6600個宿位。而港大當年就有4幢新宿舍啟用，提供1800個宿位，但仍然差2000個宿位，於是校方就喺校園附近物色租盤，由校方津貼學生租住。

除咗宿舍問題之外，課室同埋教學人手亦成為大學要面對嘅問題，理大當年就借用附近科學館嘅演講廳上堂，作為臨時措施。港大迎接新學制，就將核心課程由87個大增至172個，課程涵蓋科學與技術、人文學科、環球議題，國際文化及國家與社會等等，仲增聘124位教授，都咪話唔誇張！

不過當年新學制最深刻嘅，就係唔少學生同家長都對DSE無信心，選擇「跳船」。喺2009年首屆新高中，共有大約7.8萬名中四學生就讀，但到咗2012年首屆DSE就得返唔夠6.9萬人應考，流失接近1萬人，當中嘅6000幾人因為無法適應而重讀，大約3000名學生讀完中五之後離校。當時嘅教育評議會主席鄒秉恩形容，有近萬人「流失」，情況值得關注。 

圖為理工大學、科學館，取自網絡。