DSE放榜係人生大事，各大名校嘅狀元肯定成為傳媒爭相採訪嘅對象，仲一定會被問到之後揀咩科、想做咩工作。講開狀元，已經成為歷史嘅香港中學最後一屆會考同高考狀元，佢哋當初入大學嗰陣揀嘅科，同佢哋宜家做緊嘅工作又有無關係呢？

2011年末代會考出咗16位十優狀元，清一式都係理科生，其中一位皇仁書院狀元趙致遠同好多狀元一樣，揀咗醫科，宜家喺聯合醫院做精神科醫生。不過趙致遠過往嘅好成績對佢嘅醫生生涯都無乜幫助，狀元醫生講到自己一樣會被病人質疑、唔信任，病人仲試過話要換醫生。但係趙致遠都無氣餒，用真誠同耐性慢慢解開病人嘅心結，希望透過努力工作，真正幫到有需要嘅病人。

而2012年最後一代高考都出咗唔少4A以上嘅狀元，考到咁好嘅成績，入大學梗係想揀咩科都入到喇。不過有位4A狀元Samantha對外界俗稱嘅「神科」例如商科、醫科無興趣，揀咗新聞與傳播學。有趣嘅係，Samantha畢業之後無做同主修科嘅相關工作，反而一邊做空姐，一邊開始鋼筆書法創作，仲有埋自己嘅小品牌。Samantha唔單止無後悔自己嘅選擇，仲好滿意宜家嘅生活，佢鼓勵畢業生揀科嗰陣都應以自己嘅興趣為主。

拎到成績單之後，一定有人歡喜就有人愁。成績唔錯嘅固然值得慶賀一番，考得麻麻嘅都唔使灰心，畢竟呢次考試只係人生其中一關，未來嘅路仲好長，千祈唔好俾一時嘅失意打擊你哋嘅夢想。

圖為聖若瑟書院末代狀元，網絡圖片。