相信大家都聽過「斯德哥爾摩症候群」呢樣嘢，但係咩意思、個名點樣嚟就未必個個都清楚，有小鮮肉同事仲問大家到底係一種咩病添，有見及此，阿史一於介紹下咩係「斯德哥爾摩症候群」。

話說喺1973年，歐陸森（Olsson）同歐佛森（Olofsson）打劫瑞典首都斯德哥爾摩嘅一間銀行，佢兩個人綁架咗四個銀行職員做人質，足足挾持咗130個鐘，即係超過5日咁耐。喺呢段時間入面，呢班人質產生咗心理變化，佢哋開始同情歐陸森同歐佛森，認為兩個劫匪「照顧」同無傷害人質，返過嚟否定警察營救嘅努力。喺兩個劫匪受審嘅時候，啲人質無一個肯出嚟指證佢哋，甚至為佢哋辯護。

當時一位犯罪及心理學家貝耶羅特就將呢種心理變化、受害者同情加害者嘅現象，命名為「斯德哥爾摩症候群」。根據報道，一個被挾持嘅女職員事後多次探望入獄嘅歐陸森，最後仲結埋婚添，真係講都無人信。阿史諗起曾經有套電視劇《談判專家》，其中一段情節亦提到有人質患上斯德哥爾摩症候群，不過講到印象最深刻嘅，梗係歐陽Bobby、郭可盈等主角。而近年亦唔少人用到「斯德哥爾摩症候群」嚟批評其他人，至於用唔用得啱，就真係見仁人智喇。