現今21世紀，大家基本上唔會再喺條街度見到人力車。依種兩個轆嘅特色交通工具又名黃包車，或者叫做東洋車，依靠人力拉動，主要盛行於19世紀末到20世紀初汽車未盛行嘅年代。而喺普遍嘅東亞地區，一架人力車最多可以坐兩個人。講咁耐，大家又知唔知人力車其實係邊度嘅發明？

從外型上嚟講，人力車最早嘅原型同大約於漢代出現嘅「安車蒲輪」相似，但並唔係一個完全嘅版本。而更完整嘅人力車相信係起源於19世紀後期嘅日本，由日本嘅美國傳教士，強納森．斯科比所發明，最早只係於橫濱街上使用，傳入中國之後，因為1913年上海租界規定，公共人力車必須髹成黃色，亦有講法話架車似個包，所以後來比較多人叫佢做黃包車。

至於香港方面，第一架人力車係1874年1月由商人從日本購入，幾年之間就成為流行嘅交通工具。政府去到1883年開始規管人力車出租服務，主要針對牌照同車伕儀容，例如髮型要剪「陸軍裝」等。人力車嘅數量由1896年嘅585架，倍增至1920年代超過3000架。但係隨住1924年引入出租汽車（的士），人力車開始衰落，直至2017年僅餘一個持牌車伕洪伯。回想當年，據講唔少名人富豪好似何東、利希慎咁，屋企都有黃包車長駐，成為一種身份象徵！    

圖片嚟自網絡。