英國保守黨黨魁選舉即將揭盅，前外相約翰遜同現任外相侯俊偉其中一個將會接替文翠珊，出任黨魁兼英國首相。今次保守黨選黨魁，最後一輪選舉係經過全體黨員投票選出，不過原來以前保守黨黨員係無份選黨魁㗎！

 喺1965年之前，英國保守黨黨魁都唔係經投票選出，而係由下議院議員推舉出嚟，由於當時係無一個明確、正式嘅選舉辦法，所以有人會形容保守黨黨魁係「浮現」出嚟。保守黨議員嘅浦力迪曼（Ernest Pretyman）就形容，偉大嘅政黨領袖並唔係選出嚟，而係發展出嚟嘅。

不過到咗1963年，情況開始有變，當時嘅首相麥美倫因病辭職，黨內出現唔少潛在繼任人選，包括副首相巴第勒、財政部長麥德寧、前任大法官海爾賢等等，佢哋得到唔同方面嘅支持，例如巴第勒得到內閣支持、麥德寧得到下議院支持，而海爾賢就得到保守黨員支持。經過多方協調，最後推舉咗當時民調排第8、外相兼上議院議員霍姆接任黨魁兼首相，其後霍姆經補選進入下議院。

去到1964年大選失利，1965年保守黨黨魁改由下議院議員以選舉產生，响第一輪投票取得過半票數，並超過第二名15%以上就成功當選，一旦需要第二輪投票，得票過半數就能當選。到咗1998年，時任黨魁夏偉林提出改革，由保守黨選出兩名候選人，再由黨員投票選出新黨魁。喺2001年保守黨响大選失利，夏偉林請辭，保守黨就選出影子內閣國防發言人施志安同財政發言人克拉克俾黨員投票，最終施志安得票超過6成當選。

圖為約翰遜、侯俊偉，取自網絡。