阿史近排同中學同學聚會，見到其中一個女同學手上多咗隻戒指，就知佢好事近喇。講開戒指，宜家主要係表示婚姻狀態嘅裝飾品，咁究竟以前嘅戒指係咪咁用嘅呢？

古代嘅戒指叫做指環，唐代嗰陣已經係男女用嚟定情嘅信物之一。晚唐范攄嘅小說集《雲溪友議》度提到，唐朝官員韋皋特登留咗隻指環俾玉簫，約定幾年後會嚟娶玉簫；仲有小說合集《太平廣記》所載，書生李章武同華州王氏子婦相愛，臨別嗰陣，子婦送咗隻指環俾李章武，仲賦詩一首：「捻指環相思，見環重相憶。願君永持玩，迴圈無終極。」意思係叫李章武見指環好似見自己咁，而指環更有循環、無終極含義，寓意兩人情意延綿不絕咁解。由此可見，戒指喺唐代就已經係情人間嘅定情信物，同婚姻亦有緊密關係。

圖為河南偃師杏園村盛唐墓中出土嘅金指環，取自網絡。