早幾日睇返任賢齊、大S主演嘅《龍鳳店》，劇情非常熟口面，阿史搵返資料，原嚟套戲係改編自著名戲曲《遊龍戲鳳》。戲曲《遊龍戲鳳》講嘅係明武宗朱厚照微服私訪，邂逅龍鳳店老闆娘李鳳姐嘅故事，而故事入面嘅李鳳姐原型就係明朝著名別宮——豹房入面嘅劉夫人。

明武宗起嘅豹房入面，除咗有各式各樣嘅珍奇異獸之外，仲有由全國各地搜集返嚟嘅美女，其中有一個叫做劉良女嘅民間藝妓，好得明武宗歡心。明武宗南巡嗰陣就帶住劉良女，連賞賜寺廟嘅幡、幢都要寫上自己同劉良女個名，可見女方認真得寵。

話說劉良女本嚟係代王府嘅歌姬，武宗曾經扮軍官出入王府教坊，於是識咗劉良女。初初大家都認唔出武宗嘅真實身份，唯有劉良女覺得武宗嘅氣質同普通軍官唔同，格外留意武宗，就咁兩人撻著咗。武宗之後仲將劉良女接咗入宮，封為美人，又叫做劉夫人。武宗好寵愛劉良女，每逢豹房有人犯錯，只要劉良女出面求情，武宗都唔會追究。

圖為《龍鳳店》劇照，原圖嚟自網絡。