日本參議院早兩日改選其中124席，首相安倍晉三所屬嘅自民黨聯同執政聯盟嘅公明黨成功維持參議院內過半數議席嘅優勢，但就算連同其他贊成修憲嘅少數黨派同無黨派議員，都達唔到修憲所須嘅三份之二議席。安倍回應改選結果嘅時候，仍然「企硬」，話會繼續推動修憲，今後會爭取三份之二嘅議員支持。之前安倍次次講親修憲，都惹嚟唔少爭議，原因其實係同二戰歷史有關？

根據日本憲法，修憲係需要喺國會參眾兩院分別得到三份之二議員支持，再交由公民投票表決，過半數先至可以成功修憲。而安倍希望可以响佢2021年任期屆滿之前修憲，包括加入有關自衛隊地位和職能等4項內容。

喺第二次世界大戰結束後，美國喺1945年至1952年期間佔領日本，為咗消除日本嘅軍國主義，喺1947年實行嘅新憲法入面，第9條就列明日本放棄使用武力解決國際爭端，以及放棄因呢個目的而保持海陸空三軍嘅權利。

但到咗韓戰爆發，美國開始轉變態度，視日本為盟友，於是喺美國堅持下，日本响1954年成立自衛隊，其後喺美國嘅壓力下，日本政府多次擴展「自衛」嘅定義，曾經派部隊去中東、非洲同其他地區執行任務，雖然未曾參加戰鬥，但已引起大眾嘅強烈反對。

安倍近幾年希望透過修憲，令自衛隊「合憲化」，但考慮到執政聯盟公明黨反對修改憲法第9條嘅立場，自民黨據報將提出喺第9條之內增加條文，確立自衛隊嘅職能同地位。安倍晉三希望藉此可以令日本喺國際舞台上發揮更大作用，但日本就有唔少聲音質疑做法，指做法違背憲法第9條，而且日本過去幾十年處於和平狀態，令經濟和平崛起，唔少民眾都唔想重蹈二戰覆轍，令社會受到戰火嚴重破壞。今次改選，增加安倍政府推行修憲嘅難度，不過事實就算過到國會，都未必過到公投嗰關。

圖片為安倍晉三，取自網絡。