上星期講起台灣政府高層訪美，原來蔣介石個仔、响1970年擔任行政院副院長嘅蔣經國曾經喺訪問美國期間，遭台獨份子刺殺，但好彩美方人員反應快，先至令蔣經國避過一劫！

話說蔣經國响1970年4月中旬訪美期間，喺華盛頓同當時嘅總統尼克遜會面，之後喺4月24日轉到紐約訪問，佢走入布拉薩酒店參加午宴嘅時候，被台獨聯盟成員黃文雄、鄭自才行刺。

當時黃文雄同鄭自才分別有一支左輪連發手槍，佢哋潛伏喺示威人群當中，等到蔣經國行上酒店前石級嘅時候，鄭自才突然喺石柱旁邊竄出、散發傳單，雖然好快就被安全人員制止，但之後黃文雄就喺蔣經國後方衝出嚟，拎出手槍準備扣下板機，呢個時候美國嘅便衣警察就衝出嚟，將黃文雄隻手托高，令佢射高咗，打唔中蔣經國。鄭自才同黃文雄好快就被制服，而蔣經國就除咗佢手上隻名貴手錶，送咗俾救佢一命嗰位警員。

曾經做過蔣經國秘書嘅台灣前總統馬英九分享過，蔣經國當年遇刺之後，曾經提出同刺客見面傾計，但最後因為紐約警方唔同意，所以不了了知。台灣史學家李筱峰教授就指出，蔣經國當年逃過一劫之後，問身邊人點解台灣人要殺佢。

圖為蔣經國、當時報道，取自網絡。