前排新聞就話有幾十個示威者去咗台灣尋求庇護，阿史睇返資料，以前大陸同台灣之間都有唔少尋求庇護嘅例子。先講吓台灣，前總統馬英九响2014年就向9名投靠台灣嘅大陸人發出長期居留許可，等佢哋留2年就可以獲得身分證。其中一位獲得長期居留許可嘅大陸人士，包括2004年逃去台灣嘅燕鵬。佢响2001年因為干犯「煽動顛覆國家政權罪」，被判監一年半，到咗2004年佢被釋放「交保候審」，因為隨時會被人拉返去坐監，於是佢就走到去廈門，坐小船過去金門，但點知被大陸知道咗行蹤，搭船追趕，最後燕鵬棄船一路游到去金門，擺脫追捕。

上岸之後，燕鵬因為屬於非法入境，結果被台灣移民署拘留7個半月，直至人權團體「台灣人權促進會」搵律師爭取到緩起訴，先可以離開收容所。之後陸委會通知燕鵬，因為佢唔夠「出名」，所以唔符合《兩岸人民關係條例》入面「領導民主運動有傑出表現之具體事實及受迫害之立即危險」嘅規定，唔可以批長期居留許可俾佢，於是佢就要過住無身份、無工作、顛沛流離嘅生活，直至2013年因為國際人權專家去台灣審視人權狀況，建議台灣盡快設置「難民審查制度」。喺國際壓力之下，馬英九政府响2014年向燕鵬等9人以專案方式批出長期居留許可，承諾2年後給予身份證。

至於台灣去大陸嘅例子，最出名要數林毅夫。喺1979年5月16日，當時27歲嘅林毅夫係台灣軍方嘅上尉連長，佢游水游到去大陸。經歷一番艱辛去到之後，佢嘅經歷都幾傳奇，先喺北京大學取得經濟學碩士，之後再去到美國芝加哥大學取得經濟學博士，成為中國改革開放之後首批「海歸派」。1994年佢聯同張維迎等五個學者，創辦北京大學中國經濟研究中心，成為中國政府嘅重要智庫。到咗2008年，佢仲成為世界銀行高級副行長兼首席經濟學家。

圖片為燕鵬、林毅夫，取自網絡。