前排國際關係學者沈旭暉响Facebook分享香港歷史學者劉智鵬博士對近期香港形勢嘅分析，劉智鵬博士形容而家係香港歷史上嘅第三大災難，僅次於遷界同埋淪陷。阿史之前都介紹過唔少淪陷嘅歷史，但遷界可能對史友嚟講陌生少少，今次就一於介紹吓。

劉智鵬博士所指嘅「遷界」其實係指清朝初年，清廷為咗打擊明朝遺臣鄭成功所下達嘅「遷界令」，又稱「遷海令」，主要係命令沿海居民向內陸遷移。早於順治十三年（1656年），清廷就實行禁海政策，禁止漁船、商船出海捕魚同貿易，並禁止外來船隻進入港口停泊，試圖斷絕鄭成功嘅後路。不過鄭成功實力有返咁上下，為咗應對情況，清廷响順治十八年（1661年）實行遷界令，命令山東至廣東沿海居民向內遷移50公里。康熙三年（1664年），遷界令再進一步向內遷移30公里。

清廷下達嘅遷界令只容許沿海居民有3日時間離開，唔肯走嘅話就要死，啲居民唯有帶埋家人倉促咁離開，有唔少婦孺同埋長者因為經唔起折騰而死喺路上，亦有唔少居民用晒積蓄而餓死。香港當時同樣受到遷界令影響，居民要離開家園，令香港變成盜賊出沒之地。清初學者屈大均响《廣東新語》提到：「自有粵東以來，生靈之禍，莫慘於此。」响康熙二十二年（1683年），清廷收復台灣之後，遷界令先至被取消，正式「復界」。

圖為位於廈門嘅遷界碑，取自網絡。