近年考古界發現咗唔少墓穴，但講到聞名中外嘅，不得不提1972年於長沙出土嘅馬王堆。馬王堆除咗出土嗰陣大陣仗、十足科幻片之外，當年7月30日重見天日、千年不腐女屍辛追夫人嘅遺體保存技術更加轟動全球，甚至被譽為「20世紀中國與世界最重大的考古發現之一」。

話說喺1971年，駐守喺湖南長沙馬王堆嘅軍人，諗住喺馬王堆兩個小山坡度起間細醫院。點知就喺施工過程中，挖吓挖吓，地下鑽孔突然滲出難聞氣體，仲要噴出道火焰，認真得人驚。啲工人初初以為係「鬼火」，紛紛打電話去湖南省多個政府部門求助。最後，有人打咗去問省博物館，先解開咗「鬼火」謎團。原嚟呢啲氣體係沼氣，所以喺鑽地嘅時候先會唔覺意點燃咗沼氣，變成火焰噴出嚟。

馬王堆一號漢墓出土嘅辛追夫人外形完整，皮下組織居然仲有彈性，而且腦組織同內臟器官基本完好。2000幾年前嘅屍體竟然保存得咁好，簡直係奇跡，而千年不腐嘅原因更成為考古學界一大謎題。辛追夫人仲有一樣嘢令大眾非常深刻，就係佢嘅食道同腸胃入面居然發現近140粒未消化完嘅甜瓜子，對學術界了解當時人嘅飲食同口味有所幫助。

圖為馬王堆一號漢墓發掘現場，原圖嚟自網絡。