清朝咁多位名臣當中，李衛都算係幾與眾不同嘅一個，特別之處在於原來佢唔係好識字，但仍然得到雍正嘅信任，阿史今次就介紹吓佢當年點樣智鬥貪錢親王。

李衛係江蘇銅山人，生於一個富裕家庭，响康熙五十六年（1717年）捐錢買咗個官職嚟做，最初出任兵部員外郎一職，兩年之後轉任戶部郎中，負責向百姓收稅。根據《小倉山房文集》記載，當時有位主管戶部嘅親王，要求每收錢糧1000兩，就要額外收10兩自己落袋，但李衛覺得做法唔妥，於是向親王理論，對方梗係睬佢都傻！李衛並無就咁算數，反而諗到個辦法應對：响戶部大堂一個櫃寫上「某王贏餘」，搞到滿朝文武都知道呢件事，爭住嚟睇吓個櫃，最後呢位親王梗係唔敢再收多錢喇。

呢件事亦傳到當時係雍親王嘅胤禛知道，之後胤禛繼位，重用李衛，委任佢主管或兼管鹽政工作。喺雍正即位第一年，李衛就被委任為雲南鹽驛道，一年後升任布政使兼管鹽務工作，再過兩年，佢升任浙江巡撫兼任兩浙鹽政使。此外，李衛偵破案件亦相當了得，雍正曾多次向各地官員發批示，叫佢哋向李衛學習，形容「督撫中能察究匪類，惟李衛為第一，爾當仿效之。」

圖為李衛畫像，取自網絡。